Kubadan ABŞ-yə sərt xəbərdarlıq

Kuba Prezidenti Migel Dias-Kanel ABŞ-nin ölkəsinə qarşı mümkün hərbi müdaxilə təhdidlərinə sərt reaksiya verib. O, belə addımın regionda ciddi sabitlik pozuntusuna və “gözlənilməz qan gölünə” səbəb ola biləcəyini deyib.

“Yenisirvanli.info.az” xəbər verir ki, Kuba lideri sosial media hesabındakı paylaşımında ABŞ-nin təhdidlərini beynəlxalq hüququn pozulması kimi qiymətləndirib.

Dias-Kanel Vaşinqtonu “planetin ən böyük gücü” adlandıraraq qeyd edib ki, ABŞ-nin Kubaya qarşı mümkün hərbi müdaxiləsi regional sülh və təhlükəsizlik üçün ciddi risk yaradır.

“Kubaya qarşı təhdidin özü belə beynəlxalq cinayət sayılır. Bu təhdidin həyata keçirilməsi regional sabitlik üçün dağıdıcı nəticələr doğura və gözlənilməz qan gölünə səbəb ola bilər”, – deyə o bildirib.

Kuba Prezidenti əlavə edib ki, ölkəsi heç bir dövlət üçün təhlükə yaratmır və ABŞ-yə qarşı aqressiv siyasət yürütmür. Onun sözlərinə görə, bunu Vaşinqton administrasiyası da yaxşı bilir.

Dias-Kanel həmçinin Kubanın uzun illərdir ABŞ-nin “çoxşaxəli təzyiqləri və təcavüzkar siyasəti” ilə üzləşdiyini qeyd edib. O vurğulayıb ki, ölkəsinin mümkün hücum qarşısında özünü müdafiə etməsi beynəlxalq hüquqa uyğun qanuni haqdır.

Belarus və Rusiya nüvə təlimlərinə başladı

Belarus Rusiya ilə birlikdə nüvə təlimləri keçirir.

“Yenisirvanli.info.az” “BelTA”ya istinadən xəbər verir ki, bu barədə Belarusun Müdafiə Nazirliyi məlumat yayıb.

Təlimlər zamanı hərbi hissələrin nüvə döyüş sursatlarının çatdırılması və onların tətbiqinə hazırlıq işləri sınaqdan keçiriləcək.

Təlimlərə raket qoşunlarının və aviasiyanın hərbi hissələri cəlb edilib. Məqsəd silah və texnikanın hazırlığının yoxlanılması, həmçinin şəxsi heyətin hazırlıq səviyyəsinin təkmilləşdirilməsidir.

BƏƏ-də AES-ə dron hücumu yanğınla nəticələndi

Birləşmiş Ərəb Əmirliklərində (BƏƏ) yerləşən “Bərəkəh" Atom Elektrik Stansiyası yaxınlığında pilotsuz uçuş aparatı (PUA) hücumu nəticəsində yanğın baş verib.

“Yenisirvanli.info.az” xəbər verir ki, hadisə stansiyanın daxili təhlükəsizlik zonasından kənarda yerləşən elektrik generatorunda olub.

Məlumata görə, yanğına dərhal müdaxilə edilib. Hazırda vəziyyətin nəzarət altında olduğu bildirilir.

Rəsmilər hadisə nəticəsində xəsarət alan olmadığını, stansiyanın bütün əsas sistemlərinin normal fəaliyyətini davam etdirdiyini açıqlayıb.

ABŞ Tehranla danışıqlar üçün - 5 şərt irəli sürdü

ABŞ Tehranla danışıqlar üçün 5 əsas şərt irəli sürüb.

“Yenisirvanli.info.az” xəbər verir ki, bu barədə “Fars” agentliyi məlumat yayıb.

Bildirilib ki, Vaşinqtonun irəli sürdüyü şərtlər arasında ABŞ tərəfindən heç bir kompensasiyanın ödənilməməsi, İranın əlində olan 400 kiloqram zənginləşdirilmiş uranın ABŞ-yə təhvil verilməsi və ölkənin nüvə obyektlərindən biri istisna olmaqla, digər bütün nüvə fəaliyyətlərinin dayandırılması yer alır.

Bundan əlavə, ABŞ-nin İranın dondurulmuş aktivlərinin azad edilməsini və danışıqların başlaması üçün bütün cəbhələrdə hərbi əməliyyatların dayandırılmasını tələb etdiyi bildirilir.

Məlumata əsasən, Tehran da öz növbəsində danışıqlar üçün bir sıra şərtlər irəli sürüb. İran tərəfi Livan da daxil olmaqla, regiondakı bütün cəbhələrdə hərbi əməliyyatların dayandırılması, sanksiyaların ləğvi, dondurulmuş aktivlərin azad edilməsi, müharibə təzminatının ödənilməsi və İranın Hörmüz boğazı üzərində suverenliyinin tanınmasını tələb edir.

Hörmüz böhranı dünya ticarətini dəyişir: Nəhəng şirkətlər yeni marşrutlara keçir

Nəhəng dəniz daşıyıcıları Hörmüz boğazındakı məhdudiyyətlərdən yayınmaq üçün yeni üsul tətbiq etməyə başlayıblar.

“Yenisirvanli.info.az” xəbər verir ki, bu barədə "Financial Times" məlumat yayıb.

Bildirilib ki, şirkətlər yanacaq nəqli məqsədilə alternativ yük marşrutlarına müraciət edirlər.

"Mediterranean Shipping Company", "Maersk", "CMA CGM" və "Hapag-Lloyd" kimi karqo şirkətləri Qırmızı dəniz və Oman körfəzi limanlarından, o cümlədən Səudiyyə Ərəbistanının Yanbu və Kral Abdulla, eləcə də Birləşmiş Ərəb Əmirliklərinin Füceyrə limanlarından bölgənin əsas tranzit mərkəzləri olan Dammam, Bəsrə və Cəbəl Əliyə yeni istiqamətlər yaradıblar.

Alternativ yolların istifadəsi daşıyıcılara qismən bloklanmış Hörmüz boğazına daxil olmamağa imkan verib.

Bununla yanaşı, Şanxaydan Fars körfəzi və Qırmızı dəniz istiqamətində yükdaşıma xərcləri COVID-19 pandemiyası dövründə qeydə alınan göstəriciləri üstələyərək rekord səviyyəyə yüksəlib.

"Clarksons Research" təşkilatının hesablamalarına əsasən, mayın 15-dək sözügedən marşrut üzrə standart bir konteynerin daşınma qiyməti 980 dollardan 4 131 dollaradək artıb.

"Business Times" nəşri isə bildirir ki, gələcək illərdə də Hörmüz boğazı neft və qaz məhsullarının qlobal bazarlara çıxarılmasında əsas tranzit yolu olaraq qalacaq.

Texniki baxımdan bu boğazdan asılılığın azaldılması mümkün olsa da, belə təşəbbüslər nəhəng maliyyə vəsaiti tələb edir. Eyni zamanda, inşa ediləcək yeni boru xətlərinin dəniz vasitəsilə daşınan tranzit həcmlərini tam əvəz edə biləcəyi gözlənilmir.

ÜST Konqo və Uqandada fövqəladə vəziyyət elan etdi

Ümumdünya Səhiyyə Təşkilatı (ÜST) Konqo Demokratik Respublikası və Uqandada yayılan Ebola epidemiyasını beynəlxalq əhəmiyyətli fövqəladə vəziyyət elan edib.

“Yenisirvanli.info.az” xəbər verir ki, təşkilatın baş direktoru üzv dövlətlərlə aparılan məsləhətləşmələrdən sonra “Bundibuqio” virusunun törətdiyi xəstəliklə bağlı müvafiq qərar qəbul edib.

ÜST rəsmiləri mövcud vəziyyətin pandemiya olmadığını, lakin ictimai səhiyyə sahəsində qlobal fövqəladə hal meyarlarına cavab verdiyini vurğulayıblar.

Son məlumatlara görə, Konqo Demokratik Respublikasının üç rayonunda epidemiya səbəbindən 80 şübhəli ölüm hadisəsi və 246 yoluxma halı qeydə alınıb. Onlardan 8-i laboratoriya şəraitində tam təsdiqlənib. Qonşu Uqandada isə virusa 2 yoluxma faktı aşkarlanıb ki, onlardan da biri ölümlə nəticələnib.

Hazırda regionda virusun daha geniş ərazilərə yayılmasının qarşısını almaq üçün tədbirlər gücləndirilir.

Bekhem bu sahədə Britaniya üçün ilk oldu

Devid Bekhem Britaniya Krallığı tarixinin ilk idmançı-milyarderi olub.

“Yenisirvanli.info.az” xəbər verir ki, bu, “Sunday Times” nəşrinin açıqladığı “Rich List 2026” reytinqinə əsasən məlum olub.

Son hesablamalara görə, keçmiş futbolçu və onun həyat yoldaşı Viktoriya Bekhemin ümumi sərvəti təxminən 1,185 milyard funt sterlinqə (təxminən 2 milyard 684 milyon AZN) çatıb. Nəşrin məlumatına görə, son il ərzində Devid Bekhem kapitalını ikiqat artırmağa nail olub. Bu, əsasən onun “Inter Miami CF” futbol klubundakı payının dəyərinin sürətlə artması, həmçinin Lionel Messinin keçidindən sonra klubun davam edən kommersiya yüksəlişi sayəsində mümkün olub.

Bekhemin ən dəyərli aktivlərindən biri “Inter Miami CF” klubunun stadionu olan “Nu Stadium”un ətrafında tikilmiş 53 hektarlıq əmlak kompleksidir.

Onun əsas gəlir mənbələrindən biri də kommersiya fəaliyyətidir.

Belə ki, Bekhemin “DRJB Holdings” şirkəti son 2 il ərzində səhmdarlara 60 milyon funt sterlinqdən (təxminən 136 milyon AZN) çox dividend ödəyib. “Beksi” həm də “Authentic Brands Group” şirkətində 45 faizlik paya sahibdir.

Ailənin ümumi sərvətinə Viktoriya Bekhem də böyük töhfə verir.

Belə ki, “Spice Girls” qrupunun keçmiş üzvünün dəb brendi illik 100 milyon funtdan (təxminən 226,5 milyon AZN) çox gəlir gətirir. Ümumilikdə Viktoriyanın dəb biznesi təxminən 375 milyon funt sterlinq (təxminən 850 milyon AZN) qiymətləndirilir.

“Sarı-qırmızılılar” 26-cı çempionluğu belə qeyd etdilər - Fotolar

Məlum olduğu kimi, Türkiyənin “Qalatasaray” klubu 26-cı çempionluğunu rəsmiləşdirib.

“Yenisirvanli.info.az” xəbər verir ki, bu münasibətlə ötən gün mükafatlandırma mərasimi keçirilib.

“Qalatasaray” azarkeşləri küçələrə axışaraq bu anı böyük coşqu ilə qeyd ediblər.

Qeyd edək ki, Okan Burukun komandası Türkiyə Superliqasının 33-cü turunda “Antalyaspor” üzərində əzmkar qələbədən sonra, yəni sona 1 tur qalmış çempionluğunu rəsmiləşdirib. Bu, onların ardıcıl 4-cü qələbəsidir.

Qadınların ölkədən çıxış məhdudiyyətini ləğv etdilər

Ukraynada qadınların ölkəni tərk etməsinə tətbiq edilən məhdudiyyətlər tam aradan qaldırılıb.

“Yenisirvanli.info.az” Ukrayna mətbuatına istinadən xəbər verir ki, bu barədə ölkənin Baş naziri Yuliya Sviridenko bildirib.

O, hökumətin yeni qərarına əsasən bildirib ki, dövlət hakimiyyəti orqanlarında, yerli özünüidarəetmə orqanlarında, dövlət müəssisələrində və məhkəmələrdə tutduqları vəzifələrdən asılı olmayaraq, bütün qadınlar üçün istisnasız olaraq sərhədi keçmə məhdudiyyəti ləğv edilib.

Qeyd edək ki, Rusiya-Ukrayna müharibəsinin başlamasından sonra Ukraynada vətəndaşların müəyyən kateqoriyaları üçün sərhədi keçmə məhdudiyyətləri tətbiq edilib. Hərbi çağırış yaşında olan kişilərə tətbiq edilən ümumi çıxış qadağası qadınlara şamil edilməsə də, ayrı-ayrı normalar dövlət sektorunda çalışan qadınların ölkədən çıxışını məhdudlaşdırırdı.

İŞİD-in ikinci lideri məhv edildi

“İŞİD-in qlobal miqyasda ikinci lideri məhv edilib”.

“Yenisirvanli.info.az” xəbər verir ki, bunu ABŞ Prezidenti Donald Tramp “Truth” hesabında yazıb.

O bildirib ki, onun göstərişi ilə Amerika qüvvələri və Nigeriya Silahlı Qüvvələri birgə əməliyyat keçirərək, İŞİD-in yüksəkvəzifəli üzvlərindən biri olan Əbu Bilal əl-Minukini zərərsizləşdirib.

Tramp qeyd edib ki, əməliyyat uzun müddət planlaşdırılıb və “uğurla həyata keçirilib”.

Belə ki, İŞİD-in qlobal strukturunda ikinci şəxs hesab edilən əl-Minuki Afrikada gizləndiyini düşünsə də, ABŞ kəşfiyyatı onun fəaliyyətini izləyib.

ABŞ prezidenti qeyd edib ki, əməliyyat nəticəsində əl-Minuki artıq Afrikada terror fəaliyyətləri həyata keçirə və ya amerikalıları hədəf alan hücumların planlaşdırılmasında iştirak edə bilməyəcək.

Tramp həmçinin bu addımın İŞİD-in beynəlxalq əməliyyat imkanlarına ciddi zərbə vurduğunu vurğulayıb və əməliyyatda əməkdaşlığa görə Nigeriya hökumətinə təşəkkür edib.