Rusiya işğalçılarının Ukraynanın paytaxtı Kiyevə endirdiyi raket hücumu nəticəsində hazırda 8 nəfərin öldüyü təsdiqlənib. Əvvəlcə həlak olduğu düşünülən doqquzuncu şəxs isə əslində qalıq halında olan cəsəd parçalarıdır.

Yenisirvanli.İnfo.Az xəbər verir ki, bu barədə Ukraynanın daxili işlər naziri İqor Klimenko “Azadlıq Radiosu”na verdiyi açıqlamada bildirib.

“Hazırda biz dəqiq şəkildə 8 nəfərin öldüyünü deyə bilərik. Doqquzuncu şəxs, əvvəlcə öldüyü güman edilən, sadəcə qalıqlardır, onlar hazırda ekspertizadadır… 70-dən çox insan yaralanıb, onlardan 44-ü xəstəxanalardadır”, – deyə Klimenko bildirib. O əlavə edib ki, dağıntılar altında hələ də cəsədlər ola bilər.

Ukrayna mediasının məlumatına görə, ilkin məlumatlara əsasən, hücum nəticəsində bir ailədən iki uşaq həlak olub.

“Bildiyim qədərilə iki uşaq ölüb. Valideynləri bağ evinə gediblər. Bu ilkin məlumatdır, hələ dəqiqləşdirilməlidir”, – deyə Klimenko vurğulayıb.

Kiyev şəhər hərbi administrasiyasının nümayəndəsi Yevgeni İevlev “Novosti.Live” kanalına açıqlamasında bildirib ki, yaralıların yaşı 1,5 yaşdan 80 yaşa qədər dəyişir. O qeyd edib ki, Kiyevin bir çox rayonları hücuma məruz qalıb. Avtomobillər yanıb, qarajlar və inzibati binalar qismən dağılıb.

Bu gün, 24 aprel tarixində Rusiya Ukraynanın bir sıra şəhərlərinə, o cümlədən Kiyevə raket və dronlarla zərbələr endirib. Paytaxtın Svyatoşin rayonunda yaşayış binasında yanğın baş verib və bina qismən dağılıb.

Müdafiə məsələləri üzrə ixtisaslaşmış Defense Express ekspertləri bildiriblər ki, qalıqların təhlilinə əsasən, Rusiya Kiyevə qarşı həyata keçirdiyi bu birləşmiş hücumda Şimali Koreyaya məxsus KN-23 ballistik raketlərindən də istifadə edib.