Yenisirvanli.İnfo.Az xəbər verir ki, bunu Əmək və Əhalinin Sosial Müdafiəsi Nazirliyinin tabeçiliyində Dövlət Məşğulluq Agentliyinin mətbuat katibi Elzar Ağayev bildirib.

Onun sözlərinə görə, proqram çərçivəsində aktivlərin təqdim olunması prosesində şəffaflığın və vətəndaş məmnunluğunun təmin edilməsi məqsədilə Dövlət Məşğulluq Agentliyinin rəsmi internet saytında xüsusi reyestr yaradılıb.

"Reyestrdə aktivlərlə təmin olunan şəxslər barədə məlumatlar, təqdim edilən aktivlərin video görüntüləri və müvafiq sənədlər yerləşdirilir. 

Bu, prosesin ictimaiyyət üçün əlçatan olmasına və aktivlərin təqdim edilməsi mərhələsinin şəffaf şəkildə icra olunmasına imkan yaradır.

Qeyd edək ki, özünüməşğulluq proqramı çərçivəsində təsərrüfatların qurulması üçün verilən heyvanları vətəndaşlar özləri seçir. Paylanış prosesində vətəndaşın birbaşa iştirakı təmin edilir. Heyvanların sağlamlığına və təsərrüfat artımı üçün yararlılığına dair aidiyyəti orqanların rəyi təqdim edilir", - Elzar Ağayev vurğulayıb. 

Agentlik rəsmi deyib ki, heyvanlar verilərkən vətəndaşla təhvil-təslim aktı imzalanır və vətəndaşın verilən aktivlərin keyfiyyəti barədə razılığı olduğu halda bu aktivlər ona təqdim edilir:

"Bütün qeyd edilən sənədlər, təhvil-təslim zamanı vətəndaşların razılığı ilə çəkilən foto və video çəkilişlər saytda yerləşdirilir".

Göygöl rayon sakini Təbiət Cəfərova verilmiş heyvanlardan birinin tələf olmasına gəldikdə, E.Ağayev söyləyib ki, vətəndaşın bununla bağlı müraciətinə dərhal baxılıb, onunla artıq iş aparılıb və tələf olan heyvanın yenisi ilə əvəzlənməsi istiqamətində qərar qəbul edilib: 

"Vətəndaşların öz ailə təsərrüfatlarını qurmasına dəstək olan, uğurla icra edilən özünüməşğulluq proqramı ilə bağlı məlumatları işıqlandırarkən media qurumlarını daha diqqətli olmağa və müvafiq rəsmi qurumun mövqeyinə  yer ayırmağa dəvət edirik".

E.Ağayev kənd təsərrüfatı üzrə ekspert Vahid Məhərrəmovun fikirlərinə də münasibət bildirib və ona dəvət də göndərib: "O, sosial-iqtisadi əhəmiyyətə malik olan bu proqrama kölgə salmaq məqsədi daşıyan əsassız fikirlər səsləndirib. Hörmətli eksperti özünüməşğulluq proqramı üzrə qurulmuş uğurlu təsərrüfatlarla yaxından tanış olmaq üçün Dövlət Məşğulluq Agentiyinin sosial şəbəkə hesdablarını, medianı izləməyi tövsiyə edirik. Biz belə təsərrüfatlar haqqında məlumatları mütəmadi olaraq paylaşırıq".

Yenisirvanli.İnfo.Az